Suonne d'ajere 'ncoppe a' Tangenziale

A' gente ca s'abbraccia e se sente orgogliosa
e tu me guarde e ride ca tengo a'faccia 'nfosa.
Sti lacrime ca vide nun sò na pagliacciata
sò 'e perle cchiù brillante 'e tutta sta serata.
Ce sta chi ghiagne e fotte pecchè vò fà o'signore
e chi dinta a' na lacrima se stipa tutt'ammore
pe na maglietta azzurra e a' storia 'e na città
c'appriesso a nu pallone nu poco vò sunnà.
O' saccio c'a' partita nu serve a cancellà
camorra, deliquenza e tutte 'e 'nfamità,
però facimme apposta almeno chesta sera,
'e 'ncoppe a Tangenziale sonne suonne d'ajere.