O' Ciuccio 'e battaglia

Sò stato o'primm'attore pe' fiabe e pe' poesie
però nisciuno o' sape comm'è sta vita mia.
Me porto appriesso o'peso e sputo sangue amaro
nisciuno a me me sente nemmeno San Gennaro,
e l'unica cumpagna è a frusta do padrone
ca nun tene rispetto de lacrime 'e surore.

Cu chi ta vuò piglià si tu si nato ciuccio
chist'è o' destino tuoio, è inutile o'capriccio.
Cussì diceva sempe a' mammarella mia
si me facea cavallo cu suonno 'e fantasia:
vulesse addiventà stallone pa' battaglia
ma songo sule ciuccio ca pa' fatica arraglia.

Me porto n'cuollo o'peso 'e chistu sfruttamento
cammino 'inte a munnezza senza fà nu lamiento,
ma o'core se ne more pe' chesta fetenzia
s'anne magnate Napule e tutta a' terra mia.
E je fosse o'ciuccio scemo ch'è nato pe' patè?
Padrò, sai che te dico, tu sì cchiù ciuccio 'e me.

Padrò, sarraggio ciuccio però capisco buono
e a me m'ha rutto o'cazzo chi mi chiamma terrone
chi c'ha sempe sfruttato dai tiempi de spagnuoli,
padrò, sai che ti dico, sò lloro 'e mariuole.
Però mò basta a chiagnere, stu ciucco cchiù n'arraglia
padrò piglia a scuppetta e portame a battaglia.