Contro ogni divieto

Bandiere neazzurre, magliette a strisce scure,
nu fiume 'e gente allera, na folla a dduje culure,
se canta cammenanno, na musica e nu coro
viaggia cu sti cumpagni purtanneli a S.Siro.
Ma quanno 'e squadre scenneno dirette a centrocampo
pe saluta' stu pubblico e ghi' po' primmo tiempo
forte s'aiza 'ncielo miez'a migliar'e ggente
auta 'a voce 'e Napule senza paura 'e niente.
Primma dint'o silenzio po' fra li fischje e allucche
sta voce maje nun more ma ntrona dint'e vocche
de tifosi azzurri e arriva a tucca' 'o core
danno forza e curaggio a ogne jucatore.
Joca senza sparagno 'e forza e de passione,
senza cchiu' piglia' ciato, 'o Napule a pallone
e quanno alla fine l'arbitro dice ca e' fernuto
Milano sta chiagnenno:'o Napule ha venciuto!!!