Ce sta chi ce supporta, chesto o'sapimmo già
s'avota all'ata parte pecchè nun vò guardà
però nui simmo o'specchio da strega 'e Biancaneve
munnezza ca se magna, dulore ca se beve.

E me sò sfastriato 'e scrivere poesie
co' muorto miezza a'casa cantate a' litanie,
tenitavelle vuje a' pizza e o'mandulino
a me serve a scuppetta, aggià ffà nu casino.

Nun ve meravigliate si Napule nun canta
ma de risate voste tenimme a'panza tanta
e s'acala o'sipario, scumpare o' primmo attore
vuliveno 'e canzone, v'ate pigliate o'core.

Me tengo stretta a 'rraggia vullente dinte 'e mane
e m'appriparo a guerra senza aspettà dimane
sapenne ca a' speranza è figlia a' schiavitù
e ca o'futuro 'e Napule nun se chiamma raù.