Viola, attenti alla sorpresa...

A testa bassa

Miez'all'arena se presenta 'o matador
l'uommini l'aizzano e 'e femmen 'o dann'o cor,
bello, acchittato comm'a nu grande 'e Spagna
ammesura 'e passi dint'all'Arena Magna.
Avanza e se fa a centro, se ferma,
aspetta cu l'uocchje fissi ch'esce 'o pachiderma,
'a porta se spalanca e dint'a 'na tempesta
'e povere e corna scintillanti s'arresta.
'O toro, bellamente, s'o cerea pe' sotto,
comme chi sape pa parte soja porta' rispetto,
ma pure sape ca l'urdema parola nun e' detta
pecche' dint'a vita 'a fine nisciuno l'ha maje scritta.
Smargiasso se pallea 'o matador, move 'o drappo viola
'a ggente murmulea, ma nun vola 'na parola,
se fa curiuso 'o toro, sbuffa ma cu pacienza,
s'a piglia alleramente comme 'e chi nun ce penza.
Ma 'o gargio se fa sotto, cerca 'a provocazione,
'o sfotte, s'o pazzeja, l'appizza 'n continuazione.
'A bestia se rassegna a ffa quanto le spetta
se chiude 'a vista e ll'uocchje e ccarica a manetta,
ma chill'a lla' se scanza, 'o nfizza n'ata picca,
s'avota verso 'o pubblico, cerca l'applauso e ammicca.
Miezz'a stu trionfo, mette mano 'a muleta,
sicuro e 'o pizzo a rriso, comm'a ciente ata vote,
chiamma 'o toro facenn'abballa stu culore viola
pe cchiudere 'o spettacolo dint'a 'na mossa sola.
Ma e' allora ca vede dint'all'uocchje do' toro
azzurri comme 'o cielo 'ncopp'a nu sfondo d'oro,
na rraggia disperata ca fa na vena 'e sang
e mmanco se ne accorge quann'o'ncorn dint'o cianc.